जनकपुरधाम । आफूलाई ‘कुमारी आमा’ बताउँदै आन्दोलनरत निहारिका राजपुत अहिले विवाहको तयारीमा छन् । एक साताभित्र बिहे हुने निश्चित भएपछि बुधबार अपराह्न ४ बजे उनी बर्दिवासमा किनमेल गरिरहेको अवस्थामा भेटिइन् ।उनको साथमा छोरा बिआन मात्र थिएनन्, शिवराज श्रेष्ठ पनि थिए । तर, ठीक तीन महिना अघिसम्म अर्कै परिस्थिति थियो । निहारिका शिवराजलाई बलात्कार आरोप लगाउँदै आन्दोलनरत थिइन् ।
राष्ट्रपति कार्यालय अगाडि आत्मदाहको प्रयास, पटकपटकको गिरफ्तारी र अनशनपछि सरकार उनको माग सम्बोधन गर्ने बाटोमा अघि बढेको थियो । शिवराजले बच्चा आफ्नो नभएको दाबी गर्दै आएका थिए । तर, निहारिकाको माग बमोजिम बच्चा र शिवराजको डीएनए परीक्षण गर्ने निर्णय भयो । १८ कात्तिकमा खुमलटारस्थित राष्ट्रिय विधि विज्ञान प्रयोगशालामा गरिएको बच्चाको डीएनए जाँच श्रेष्ठबाट निकालिएको डीएनएनको नमूनासँग मेल खायो ।
पहिले निहारिकाले डीएनए मेल खाए श्रेष्ठलाई हदैसम्मको सजाय हुनुपर्ने माग गरेकी थिइन् । तर, सोमबार एकाएक निहारिका र शिवराजबीच जिल्ला अदालत, धनुषामा मिलापत्र भएको छ ।
जिल्ला न्यायाधीश ब्रजेश प्याकुरेलको रोहबरमा मुलुकी देवानी कार्यविधि संहिता २०७४ को दफा १९३ (४) बमोजिम निहारिकाले शिवराजसँग मिलापत्र गरेकी हुन् । आइतबार मात्रै जिल्ला अदालत, धनुषामा निहारिकाले अंश मुद्दा दिएकी थिइन् । सोमबार मिलापत्र गरी दुईबीच पति–पत्नीका रुपमा बस्ने निर्णय भएको जिल्ला अदालतका सूचना अधिकारी गंगाकुमार मिश्रले जानकारी दिए ।
‘म र नाबालक छोरा समेतलाई इज्जत अनुसार खान, लाउन, औषधोपचार खर्च, छोराको पढाइ लेखाइ खर्च तथा पिता पतिको हुने कर्तव्य निर्वाह गर्छु भनेर विपक्षीले स्वीकार गरेकाले म पनि एकासगोलमा नै बस्ने गरी फिराद दाबी छाडेको’, मिलापत्रमा भनिएको छ ।
उनीहरुले सोमबार मिलापत्र मात्र गरेनन्, अदालती विवाह (कोर्ट म्यारिज) समेत गरिसकेका छन् । यही साताभित्र सामाजिक परम्परा अनुसार मन्दिरमा पनि विवाह गर्ने तयारी गरेको निहारिकाले बताइन् ।
‘अदालतमा कोर्ट म्यारेज भइसक्यो, यही साता मन्दिरमा पनि परिवारसहित टिकाटालो गर्दैछौं’, उनले अनलाइनखबरसँग भनिन्, ‘राम्रोसँग जिन्दगी बितोस् भन्ने हो, त्यही सोचेर अगाडि बढेको छु ।’पहिले निहारिकाले आरोप लगाएका शिवराज पनि अतितहरुलाई बिर्सेर नयाँ शिराबाट जिन्दगी अगाडि बढाउन तयार रहेको बताउँछन् ।
‘पहिला मिलेको भए दुवै जना र घरपरिवारले यति दुःख भोग्नु पर्थेन होला । तर, दुवै जना अर्काको बहकाउमा लाग्यौं’, शिवराजले अनलाइनखबरसँग भने, ‘त्यतिबेला हामी परिपक्व थिएनौं । मिलाउनेभन्दा पनि दुवैतिर बिगार्ने मान्छेहरुले खेले ।’
शिवराजले निहारिकाले पनि धेरै दुःख पीडा पाएको बताउँदै विगतको सबै विषयलाई भुलेर नयाँ जीवन अगाडि बढाउने निर्णय गरेको बताए ।
जब छोराले भिडियो कल गरे…
निहारिका र शिवराजबीच मेलमिलाप हुने परिस्थिति कसरी बन्यो ? यसपछाडिको रोचक कथा शिवराज र निहारिका स्वयंले अनलाइनखबरसँग सुनाएका छन् ।
निहारिकाका अनुसार सम्बन्ध बिग्रे पनि शिवराजको मोबाइल नम्बर उनीसँग सेभ छँदै थियो । अघिल्लो साता निहारिकाकी छोरा विआन मोबाइल खेलाउँदै थिए । त्यतिबेला झुक्किएर ह्वाट्सएपमा शिवराजको नम्बरमा भिडियो कल गएछ ।
बिआन शिवराजसँग भिडियो कलमा देखेपछि निहारिकाले गाली गरिन् । तुरुन्तै फोन खोसेर ‘किन गरिस्’ भन्दै शिवराजप्रति आक्रोश व्यक्त गरिन् । तर, शिवराजले आफूले कल नगरेको भन्दै एकपटक फोन कताबाट आएको हो हेर्न भने ।
त्यसक्रममा छोराले नै फोन गरेको थाहा पाएको निहारिका बताउँछिन् । ‘शिवराजले मलाई अनब्लक गरेको मैले थाहै पाएको थिइन, त्यसैले सुरुमा कुरा गरिरहेको देख्दा आक्रोशित बनेँ’, उनी भन्छिन्, ‘मैले प्रहरीमा कम्प्लेन गरिदिन्छु पनि भनेकी थिएँ । तर खास कुरा अर्कै रहेछ ।’ त्यसपछि शिवराजले उनलाई भेटका लागि प्रस्ताव गरे ।
‘सुरुमा उनले स्वीकारिनन्, मैले दुई मिनेट मात्र भएपनि बाबुलाई हेर्न चाहन्छु भनेँ’, शिवराज भन्छन्, ‘निकै रिक्वेस्ट गरेपछि दुवै जना भेट्ने भयौं, त्यसपछि मेलमिलापको कुरा अघि बढेको हो ।’
