फेरी एकजना यात्रु मात्रै बोकेर उड्यो बुद्ध एयरको जहाज

समाचार

काठमाडौंबाट झापाको भद्रपुर गएको बुद्ध एयरको ७२ सिटे जहाजले आज एकजना मात्र यात्रु पाएको छ । काठमाडौंबाट बिराटनगर जाँदा दुईपटक एकजना मात्र यात्रु लिएर गएको बुद्ध एयर आज भद्रपुर जाँदासमेत एकजना मात्र यात्रु लिएर गएको हो ।

यो एक हप्ताको अवधिमा ७२ सिटे जहाजमा एकजना मात्र यात्रु भएको यो तेस्रोपटक हो । मंगलबार काठमाडौंबाट बिराटनगर गएको बुद्ध एयरको अन्तिम फ्लाइटमा एकल यात्रु थिए उद्धव पौडेल, बिहीबार बिराटनगर पुगेका बुद्ध एयरको ७२ सिटे जहाजका एकल यात्रु थिए सन्तोष सापकोटा ।

जहाज नै चार्टड गरेको जस्तो भान हुने गरी शनिबार राति भद्रपुर पुगेकी यात्रु हुन् झापा चन्द्रगढीकी लक्ष्मी घिमिरे । उनी आज काठमाडौंबाट भद्रपुर जाने निर्धारित ७:२५ को विमानकी एक्ली यात्रु हुन् । निर्धारित समयमा उड्नुपर्ने बिमान ९ बजेमात्र काठमाडौंबाट भद्रपुरको लागि उडेको हो ।

यो बिमान भद्रपुरबाट प्यासेन्जर बोकेर काठमाडौं फर्कने बताइएको छ । यात्रु घिमिरेले पाँच हजार ७५० रुपैयाँको टिकट काटेर जहाज चार्टड नै गरेकोजस्तो भान हुनेगरी भद्रपुर पुगेकी हुन् । उनी नेपाल पत्रकार महासंघ झापा शाखाको पूर्वअध्यक्ष तारामणी सापकोटाको धर्मपत्नी हुन् ।

Leave a Reply

Your email address will not be published. Required fields are marked *